Cantu in Re

Posca de  calchi chida de pausa chelzo torrare cun una bella cantada in re de Francesco Demuru (sa poesia "Sa tempesta" de Paolo Mossa), accumpanzadu dae sa chiterra de Bruno Maludrottu e sa fisarmonica de Graziano Caddeo
Dae su canale meu de YouTube: caltazzu92

Paraulas

Firma, firma! A ue fues?
Clori bella, inoghe resta...
Mira chi grave tempesta
sun minattende sas nues.

Inoghe solu has iscampu:
firmadi, Clori inumana...
Sa 'idda est troppu lontana,
de percias nudu est su campu.
Firma! Ohimè, ite lampu...
No intendes ite tronu?
Lassa chi torren in bonu
sa conturbadas aeras,
non ses in manos a feras
de s'africana foresta.

Mira chi grave tempesta
sun minettende sas nues!

(finale de sa poesia)

S'orcu non so pro chi orrore
ti fetta e fuas goie.
Ma cuddu so chi unu die
amadu has de tant'amore...
Motivu a giustu rancore
eo t'hapo tentu e non dadu...
Orvidemus su passadu
pro un 'istante assunessi...
S'andas como essi-per-essi
curres a morte funesta.

Mira chi grave tempesta
sun minettende sas nues!

Prite goi zegamente
cheres sa morte affrontare?
Tantu t'affannat restare
pro pagu a mie presente?
Non timas no, chi t'ammente
sa paga fide ch'has tentu,
s'affalzadu giuramentu
sa fatta traittoria...
si sicchet sa limba mia
prima de t'esser molesta.

Mira chi grave tempesta
sun minettende sas nues!

Gratzie a tottu

Cun custu post chelzo ringratziare tottu sos chi sighint custu blog e chi lu faghent connoschere a amigos e parentes, cheret narrere chi s'interessu pro su cantu a chiterra b'este e fintas chi bi sunt sos appassionados de custas cosas, no las amusa a perdere mai! Iscujademi si custas dies no so postende nudda ma so impignadu, dai sa chida chi enidi chilco de sighire a pubblicare atteru materiale!!
Gratzie ancora e saludos a tottu!