Ischema de cantu de sos muttos

Sos muttos o mutos sunt forsi sa cantada pius allegra de su cantu a chiterra e sunt dae sempre cantados in tottas sas garas e in sas registraziones de cassettas e cd.
Sa difficultade pius manna pro chi los cheret cantare est de seguru s'ischema de sas rimas: sos muttos sunt pro sa mazore parte sestinas (Franco Denanni nde cantat unu chi este una ottava), chi devimus biere comente duas terzinas. Sa prima terzina faghet de introdutzione a su messaggiu printzipale chi est in sa segunda terzina. Sa chi cumandat sas rimas cando si cantant sos muttos est però sa prima terzina. Incominzamu a los cumprender mezzus cun d'un'esempiu:

Sas monzas de Paule
falan a passizzare 
a su cunventu nou
los diant interrare
su coro meu e tou
tott'in d'unu baule

Sos culores ch'appo impittadu pro evidentziare sos versos faghet notare dae subitu comente sos versos de sa prima e de sa segunda terzina sient ligados segundu un'ischema A B C B C A.

Idimus como un'isterrida cumpleta e comente la cantare. Primm'e tottu si cantat sa prima terzina gasi coment'est, poi si incominzat a cantare un versu de sa prima terzina sighidu dae sos tres de sa segunda rispettende unu pretzisu ordine (sa chi cumandat sa rima est sa prima terzina).
Idimus s'esempiu e poi lu cummentamus:

1) Sas monzas de Paule
falan a passizzare 
a su cunventu nou

2)Sas monzas de Paule  
los diant interrare
su coro meu e tou
tott'in d'unu baule

3)falan a passizzare  
tott'in d'unu baule
su coro meu e tou
los diant interrare 

(cominzat su pezzu pius altu e veloce)
4)a su cunventu nou
los diant interrare 
tott'in d'unu baule
su coro meu e tou

Cun s'ischema in dainanti idimus de cumprendere comente funzionat:
1. Si cantat sa prima terzina (poi amus a cantare in quartinas)
2. Si cantat su primu versu de sa prima terzina ("Sas monzas de Paule") e sa segunda gasi comente est iscritta a incominzu (notare chi in custa quartina chi amus creadu su primu e s'ultimu versu sunt in rima)
3. Si cantat su segundu versu de sa prima terzina ("falan a passizzare") sighidu dai s'ultimu versu de sa segunda terzina chi innati fit s'ultimu versu de sa quartina chi amus cantadu in su puntu 2 ("tott'in d'unu baule"), poi ponimus su segundu versu de sa segunda terzina ("su coro meu e tou") e a ultimu ponimus su versu de sa segunda terzina chi nos est restadu ("los diant interrare ") (chi est in rima cun su primu versu de sa quartina 2)
4) Si faghe sa matessi cosa ch'amus fattu in su puntu 3 però cantende s'ultimu versu de sa prima terzina ("a su cunventu nou") e girende sos versos de sa segunda terzina de conseguenscia comente in s'ischema de subra



Variasciones
- Invece de cantare sa "4)" si torrat a cantare sa "2)"
- Invece de tancare subitu sa "4)" si faghet una nota de suspensione (penso chi siet un'accoldu de settima) e si torrat a cantare s'ultimu versu ("su coro meu e tou")

Cunsizzos:
S'ischema de sas rimas no cheret imparadu meccanicamente ("Como canto su segundu versu de sa prima terzina, poi bi ponzo tale versu poi tale versu e via) ma imparadelu sighende sas rimas! Una 'olta chi l'imparades poi azzis a biere chi est pius fatzile a lu cantare chi a l'ispiegare a sos atteros!