Muttu prolungadu

Su muttu prolungadu est una cantada a muttu meda pius longa, chi sighit un pretzisu testu chena sos giros chi si faghent in d'unu muttu normale. De su muttu però cunservat sa cadenza e su tonu.
In cust'esempiu Emanuele Bazzoni cantat su "Muttu de dispedida" de Antonio Stefano Demuru cantadore de sa prima medade se su '900 (e paesanu meu). Accumpanzant cun sa chiterra Nino Manca e cun sa fisarmonica Gianuario Sannia.
Dae su canale caltazzu92

Paraulas

Adiu e bonasera
zent'amada bos lasso
su coro meu inoghe

Su chi bos naro a boghe
cunfido e lu declaro
su chi a boghe bos naro
est giustu comente Deu

Adiu e bonasera
zent'amada bos lasso
inoghe su coro meu

Custu populu intreu
cun piaghere e gustu
populu intreu custu
ringratzio e adoro

Adiu e bonasera
zent'amada bos lasso
inoghe su meu coro

Unidos cun decoro
bois sezzis, già bos vido
cun decoro unidos
bois sezzis dignamente

Su coro meu inoghe
adiu e bonasera
bos lasso amada zente

So gratu immensamente
pro cust'onore fattu
immensamente gratu
bos so zente educada

Su coro meu inoghe
adiu e bonasera
bos lasso zente amada

Sa presente serada
l'at fatta ennere in mente
sa serada presente
a monte no la passo

Su coro meu inoghe
adiu e bonasera
zent'amada bos lasso

E bois cun ispasso
vivedas sempre goi
e cun ispasso bois
fattedas a manera

Su coro meu inoghe
zent'amada bos lasso
adiu e bonasera

Custa cantada vera
sempre attonada e giusta
cantada vera custa
conclùo in custa zona

Su coro meu inoghe
zent'amada bos lasso
adiu e sera 'ona

E infine perdona
populu in custu fine
e perdonami infine
cantende ca m'avvio

Su coro meu inoghe
zent'amada bos lasso
bonasera e adiu

e custa cantada vera
su coro meu inoghe
zent'amada bos lasso
adiu e bonasera
adiu e bonasera